काठमाडौं- पुँजी बजार सुधारको माग गर्दै सेयर बजारका लगानीकर्ता तिलक कोइरालाले आमरण अनसन सुरु गरेका छन् ।
आइतबार विहान सिंहदरवार प्लाजास्थित नेप्सेको भवन अगाडि कोइराला अनसन बसेका छन् । सेयर बजार सुधारका लागि गर्नुपर्ने १८ वटा कामहरु सरकारी पक्षबाट नभएपछि कोइरालाले अनसुरु बस्न बाध्य भएको जनाएका छन् ।
कोइराला यस अघि पनि पुँजी बजार सुधार र विस्तारका लागि भन्दै आमरण अनसन बसेका थिए । डेढ वर्ष पहिले लगानीकर्ताहरु आन्दोलित भए पछि मुद्रा तथा पुँजी बजारको विषयमा अध्ययन गर्न भन्दैअर्थमन्त्रालयले एउटा कार्यदल बनाएको थियो ।
उक्त कार्यदलले दिएका सुझावहरु मध्ये पुरा गर्नै पर्ने १८ वटा कामहरु पुरा नगरिएकाले अनसन बस्नु परेको कोइराला बताउछन् । १८ बुँदामा पहिलो ब्रोकर कम्पनीहरुको सञ्चालन तथा इजाजत नीतिमा पुनरावलोकन हुनु पर्ने, वाणिज्य बैंकहरुलाई मापदण्ड पुरा गरी ब्रोकर लाइसेन्स दिनु पर्ने, ब्रोकर कम्पनीहरु गाभ्ने गाभिने स्म्बन्धी नीतिगत व्यवस्था हुनुपर्ने, ब्रोकर कम्पनीहरुलाई मार्जिन कर्जा कारोबार गर्न इजाजत दिनु पर्ने लगायतका विषयहरु रहेका छन् ।
यसैगरी नेप्सेमा सूचीकृत वास्तविक क्षेत्रका कम्पनीहरुको नियमनको लागि छुट्टै नियमनकारी निकाय स्थापना गर्नुपर्ने, नेप्समो रहेको सरकार र राष्ट्र बैंकको सेयर बिक्री गरी नप्सेको पुनरसंरचना गर्नु लगायतका विषयहरु रहेका छन् ।
