सोलुखुम्बु – नेपाली कांग्रेस सोलुखुम्बुको संगठन सुदृढीकरण अभियान नेचासल्यानमा सम्पन्न भएको छ । पार्टी केन्द्रीय सदस्यद्वय बल बहादुर केसी र आङ गेलु शेर्पाको विशेष उपस्थितीमा सोमवार नेचासल्यानमा कार्यक्रम सम्पन्न भएको हो ।
नेपाली कांग्रेस प्रदेश सभा क्षेत्र ‘क’ को समन्वय तथा पार्टीको पालिका कार्यसमितिको आयोजनामा भएको उक्त कार्यक्रममा अधिकांश नेता कार्यकताहरुले पार्टी एक ढिक्का हुँदा विरोधीहरुले शिर उठाउन नपाउने बताएका छन् ।
नेपाली कांग्रेस आफैँ बलियो र जनमत उच्च भएको दल भएकाले पार्टी एक ढिक्का भए कसैले जित्न नसक्ने कार्यकर्ताको भनाइ थियो । अभियानमा केन्द्रीय नेता तथा जिल्ला स्तरका नेताहरुले आफ्नो् भनाइ कम र कार्यकर्ताको भनाई बढी सुन्नमा समय खर्च गरेका थिए ।
नेपाली कांग्रेस प्रदेश सभा क्षेत्र ‘क’ का सभापति धनजन राईको सभापतित्वमा भएको उक्त कार्यक्रममा पार्टीका जिल्ला सभापति नाम्गेल जाङबु शेर्पा, नेताहरु विनोद बस्नेत, प्रकाशसिंह कार्की लगायतको सहभागिता रहेको थियो ।
