सोलुखुम्बु – सडकमार्गबाट एकै हप्ता झण्डै ४ सय जना विदेशी पर्यटक सोलुखुम्बु जिल्ला भित्रिएका छन् । पछिल्लो एक सातामा गाडी मार्फत २४३ पुरुष र १०८ जना महिला गरी ३५१ जना विदेशी पर्यटक जिल्ला भित्रिएको ट्राफिक प्रहरी पोष्ट पत्तालेले जनाएको छ ।
सोही अवधिमा ५६ महिला र ६१ पुरुष गरी ११७ जना विदेशी पर्यटक स्थलमार्गको प्रयोग गरी बाहिरिएका छन् । पर्यटकीय सिजन भएकाले विदेशीहरु काठमाण्डौँबाट स्थलमार्ग मार्फत सल्लेरी हुँदै खुम्बु जाने पर्यटकहरु बढिरहेको ट्राफिक प्रहरी जिवन बस्नेतले जानकारी दिनुभयो ।
कतिपय पर्यटकहरु गाडी नै रिजर्भ गरेर आउने गरेको उहाँको भनाई छ । सल्लेरीबाट थामडाँडासम्म सडक सवारी सञ्चालन भएसँगै काठमाण्डौँबाट स्थलमार्ग हुँदै सगरमाथा क्षेत्र भ्रमणमा पुग्ने विदेशीको संख्या बढिरहेका छन् ।
काठमाण्डौँबाट खुम्बु आउने पर्यटकहरुका लागि रामेछापको मन्थलीबाट लुक्ला उडान भईरहेका छन् । तर काठमाण्डौँबाट मन्थली र त्यहाँबाट लुक्ला जान झन्जट हुने भन्दै कतिपय पर्यटकहरु सडकमार्गको प्रयोग गर्न रुचाउन थालेका छन् ।
मन्थलीबाट समयमा उडान नहुने र त्यहाँ उपयुक्त खान बस्नको समेत व्यवस्था नहुँदा पर्यटकहरुलाई सास्ती हुने गरेको व्यवसायीहरु बताउँछन् ।
