सोलुखुम्बु : प्रतिकूल मौसमका कारण हवाई उडान प्रभावित हुँदा सगरमाथा क्षेत्र भ्रमणमा निस्किएका पर्यटकहरु मर्कामा परेका छन् । पछिल्लो दुई दिनयता मौसममा आएको परिवर्तनले तेन्जिङ हिल्लारी विमानस्थल लुक्लामा उडान प्रभावित हुँदा पर्यटकहरु समस्यामा परेका हुन् ।
पर्यटकीय सिजन भएका खुम्बु भ्रमणमा आउने अधिकांश पर्यटकहरु जहाज मार्फत लुक्ला हुँदै उकालो लाग्ने गर्छन् । तर मौसम प्रतिकूल हुँदा तालिका अनुसार जहाज उडान हुन नसक्दा रामेछापको मन्थलीमा नै पर्यटकहरु रोकिएको पर्यटन व्यवसायी फूर्वा शेर्पाले बताउनुभयो ।
नेपाल नागरिक उड्ययन प्राधिकरण लुक्लाका प्रमुख उमेश पन्थीका अनुसार आज बिहिवार काठमाण्डौँ र मन्थलीबाट लुक्लामा ४० वटा उडान तालिका भएपनि मौसमका कारण अधिकांश रद्ध भएको छ । “मन्थलीबाट बिहान पर्यटक लिएर लुक्ला आएको चार वटा विमान मौसमका कारण लुक्लामा नै रोकिएको प्रमुख पन्थीको भनाइ छ ।
बिहान मौसम अलिक खुलेकाले विमान आयो तर फर्किन सकेन, भिजिभिलिटी नपुगेकाले जहाज यही रोकिएको छ ।”, उहाँले भन्नुभयो । बुधवार पनि मौसमले साथ नदिदा लुक्लाको अधिकांश उडान स्थगित गरिएको नेपाल नागरिक उड्ययन प्राधिकरण लुक्लाले जनाएको छ । सगरमाथा क्षेत्रबाट काठमाण्डौँ फर्किन चहाने १०० जना भन्दा बढी पर्यटकहरु अहिले लुक्लामा रोकिएको तारा एयरलाइन्स लुक्लाका इन्चार्ज अमृत मगरले बताउनुभयो ।
मौसम तत्काल खुल्ने सम्भावना नभएपछि कतिपय पर्यटकहरु हिडेर थामडाँडा पुगेरर त्यहाँबाट गाडी मार्फत सल्लेरी हुँदै काठमाण्डौँ फर्किएका छन् । रामेछापको मन्थलीमा २०० जना भन्दा धेरै पर्यटकहरु लुक्ला जानका लागि मौसम अनुकुलताको पर्खाइमा रहेको स्थानीय जगत थापाले बताउनुभयो ।
उहाँका अनुसार काठमाण्डौँबाट सगरमाथा क्षेत्र भ्रमणमा निस्किएका स्वदेशी तथा विदेशी पर्यटकहरु उडान प्रभावित हुँदा मन्थलीमै अलपत्र पुगेका हुन् । ‘भिजिबिलिटी’ कमजोर हुँदा आन्तरिक र अन्तर्राष्ट्रिय दुवैतर्फको उडान प्रभावित भएको त्रिभुवन अन्तर्राष्ट्रिय विमानस्थलका प्रवक्ता सुवास झाल बताउनुभयो । उहाँका अनुसार एयर चाइनाको जहाज ‘डाइभर्ट’ भएको छ भने अन्य जहाज आकाशमा फन्को लगाउने (होल्ड) भएका छन् ।
